நாடாளுமன்றத்தில் ஒரு மசோதா நிறைவேற வேண்டுமென்றால், மக்களால் நேரடியாக தேர்ந்தெடுக்கப்படும் மக்களவை எம்பிக்களை போலவே, மாநிலங்களவை எம்பிக்களின் ஆதரவும் ஒரு கட்சிக்கு அவசியம். மாநில சட்டமன்றங்களில் ஒரு கட்சிக்கு உள்ள எம்எல்ஏக்களின் வலிமையை பொறுத்தே மாநிலங்களவையில் அக்கட்சியின் எம்பிக்களின் எண்ணிக்கை கூடும்.

 

அந்த வகையில் பஞ்சாப், அசாம், நாகாலாந்து, திரிபுரா உள்ளிட்ட 6 மாநிலங்களில் விரைவில் காலியாக உள்ள 13 மாநிலங்களவை எம்பிக்களின் பதவிக்கு சமீபத்தில் தேர்தல் நடைபெற்றது.

 

இதில், இமாச்சல பிரதேசம், நாகாலாந்து ஆகிய மாநிலங்களில் தலா ஒரு எம்பி பதவியை பாஜக போட்டியின்றி கைப்பற்றியது. அசாமில் 2 எம்பிக்கள், திரிபுராவில் ஒரு எம்பி பதவியை அக்கட்சி வென்றது. இதனையடுத்து மாநிலங்களவையில் பாஜகவின் பலம் 100 ஆக அதிகரித்துள்ளது. இதன்மூலம் 1990 க்கு பிறகு மாநிலங்களவையில் 100 எம்பிக்களை கடந்த முதல் கட்சி என்ற சாதனையை பாஜக பெற்றுள்ளது.

 

245 உறுப்பினர்களைக் கொண்ட மாநிலங்களவையில் 2104 இல் பாஜகவின் பலம் 55 ஆக இருந்தது. அதன்பின்னர் பல மாநிலங்களில் அக்கட்சி ஆட்சியை கைப்பற்றியதையடுத்து, மாநிலங்களவையில் பாஜக எம்பிக்களின் எண்ணிக்கை படிப்படியாக உயர்ந்து தற்போது 100 என்ற மைக்கல்லை கடந்துள்ளது.

 

32 ஆண்டுகளுக்கு முன்பு, 1990 இல் காங்கிரஸ் கட்சி, மாநிலங்களவையில் 100 உறுப்பினர்கள் என்ற மைல்கல்லை கடந்து 108 உறுப்பினர்களைக் கொண்டிருந்தது. அதன் பின்னர் தற்போது ராஜ்யசபாவில் 100 எம்பிக்களை கொண்டுள்ள கட்சியாக பாஜக திகழ்கிறது.