நாடாளுமன்ற மாநிலங்களவையில் விரைவில் காலியாக உள்ள 57 எம்பி இடங்களுக்கான தேர்தல் ஜூன் 10 ஆம் தேதி நடைபெற உள்ளது. இதில் தமிழகத்தில் இருந்து 6 எம்பிக்கள் தேர்ந்தெடுக்கப்பட உள்ளனர் இவர்களில் திமுக கூட்டணியில் இருந்து 4 பேரும், அதிமுக கூட்டணியில் இருந்து 2 எம்பிக்களும் தேர்ந்தெடுக்க்ப்பட உ்ள்ளனர்.

 

இந்த நிலையில் மாநிலங்களவைத் தேர்தில் அதிமுக ஆதரவு தரும்படி, கூட்டணி கட்சியான பாமகவை அக்கட்சியின் தலைமை கேட்டுக் கொண்டிருந்தது. இதனையடுத்து இந்த தேர்தலில் பாமகவின் நிலைப்பாடு என்ன என்பது குறித்து அக்கட்சியின் தலைவர் ஜி.கே.மணி தெரிவித்துள்ளார்.

 

இதுதொடர்பாக அவர் இன்று வெளியிட்டுள்ள அறிக்கையில், 'பாட்டாளி மக்கள் கட்சியின் நிறுவனர் டாக்டர் ராமதாஸை அதிமுக மாவட்ட செயலாளர்களும், முன்னாள் அமைச்சர்களுமான சி.வி.சண்முகம், கே.பி. அன்பழகன், எம்.சி. சம்பத் உள்ளிட்டோர் அடங்கிய அதிமுக நிர்வாகிகள் குழு இன்று காலை தைலாபுரம் தோட்டத்தில் சந்தித்து பேசினார்கள்.

 

தமிழ்நாட்டிலிருந்து மாநிலங்களவைக்கு 6 உறுப்பினர்களை தேர்ந்தெடுப்பதற்காக அடுத்த மாதம் நடைபெற உள்ள தேர்தலில் அதிமுக வேட்பாளர்களுக்கு பாட்டாளி மக்கள் கட்சியின் ஆதரவைக் கோரி அதிமுகவின் ஒருங்கிணைப்பாளர் ஓ.பன்னீர்செல்வம், இணை ஒருங்கிணைப்பாளர் எடப்பாடி பழனிச்சாமி ஆகியோர் எழுதிய கடிதத்தை அப்போது அவர்கள் ராமதாசிடம் அளித்தனர். மாநிலங்களவைத் தேர்தலில் அதிமுக சார்பில் போட்டியிடும் வேட்பாளர்களுக்கு ஆதரவளிக்க வேண்டும் என்று அதிமுக குழுவினரும் கேட்டுக் கொண்டனர்.

 

அதிமுகவின் கோரிக்கை குறித்து கட்சியின் மூத்த நிர்வாகிகளுடன் ராமதாஸ் நடத்திய கலந்தாய்வில், அதிமுக வேட்பாளர்களை ஆதரிப்பது என ஒருமனதாக முடிவு செய்யப்பட்டது. அதன்படி வரும் மாநிலங்களவைத் தேர்தலில் அதிமுகவுக்கு பாட்டாளி மக்கள் கட்சி ஆதரவளிக்கும் என்பதை டாக்டர் ராமதாஸ், அன்புமணி ராமதாஸ் ஆகியோரின் ஒப்புதலுடன் தெரிவித்துக் கொள்கிறேன்' ஜி.கே.மணி தெரிவித்துள்ளார்.

 

அதிமுக தலைமையிலான தேசிய ஜனநாயக கூட்டணியில் அங்கம் வகித்துவரும் பாமகவுக்கு, தமிழக சட்டப்பேரவையில் தற்போது 5 எம்எல்ஏக்கள் உள்ளனர்.