தமிழக பாஜக தலைவர் கே.அண்ணாமலை, மத்திய அமைச்சர் ஆவதற்கான வேலைகளில் மும்முரமாக ஈடுபட்டு வருவதாக தகவல்கள் வெளியாகி உள்ளன.

 

தமிழக பாஜக தலைவராக, கே.அண்ணாமலை பொறுப்பேற்றதில் இருந்து ஆளும் திமுக அரசு மீது கடுமையான விமர்சனங்களைத் தொடர்ந்து வைத்துக் கொண்டே இருக்கிறார். முதலமைச்சர் மு.க.ஸ்டாலின் முதல் அமைச்சர்கள் வரை என, அனைவர் மீது குற்றச்சாட்டுகளை அடுக்கிக் கொண்டே வருகிறார்.

 

அண்மையில், செய்தியாளர்களைச் சந்தித்த தமிழக காங்கிரஸ் கட்சியின் முன்னாள் தலைவர் ஈவிகேஎஸ். இளங்கோவன், "தமிழக பாஜக தலைவராக இருந்த தமிழிசை சவுந்தரராஜன், தெலங்கானா மற்றும் புதுச்சேரி கவர்னர் ஆகிவிட்டார். அடுத்த தலைவராக இருந்த எல்.முருகன், மத்திய அமைச்சராகி விட்டார். அதேபோல, அண்ணாமலையும் அந்தமான் கவர்னர் பதவியைக் குறிவைத்துக் காய் நகர்த்தி வருகிறார். அவர்களுக்குக் கிடைத்தது போல தனக்கும் கவர்னர் பதவி கிடைக்கும் என்று அண்ணாமலை துடிக்கிறார். அந்த காரணத்தினால் தான் தினமும் திமுக மீது கடுமையான விமர்சனங்களை முன்வைத்துக் கொண்டிருக்கிறார்" என தெரிவித்தார்.

 

 

அந்தமான் ஆளுநர் பதவிக்கு அண்ணாமலை முயற்சி செய்கிறார் என்பது முழுக்க முழுக்க தவறான தகவல். ஒரு யூனியன் பிரதேசத்தின் துணைநிலை ஆளுநராக முயற்சி செய்வாரா என்ன? அவரின் இலக்கு வேறு. தமிழிசை சவுந்தரராஜன் தெலங்கானா ஆளுநர். கூடுதல் பொறுப்பாகத் தான் புதுச்சேரியின் துணை நிலை ஆளுநர் பதவி வழங்கப்பட்டிருக்கிறது. அதே போல, எல்.முருகனுக்கு மத்திய இணை அமைச்சர் பதவி வழங்கப்பட்டிருக்கிறது.

 

2024 ஆம் ஆண்டு நாடாளுமன்றத் தேர்தலுக்கான களப் பணிகளை அண்ணாமலை இப்போதிலிருந்தே தொடங்கி விட்டார். மக்களவைத் தேர்தலில் கரூர் அல்லது ஈரோடு நாடாளுமன்றத் தொகுதியில் அவர் போட்டியிட முடிவு செய்துள்ளார். தேர்தலில் வெற்றி பெற வேண்டும் என்பதற்காக அதற்கான ஆயத்தப் பணிகளை அவர் தொடங்கி விட்டார்.

 

மக்களவைத் தேர்தலில் வெற்றி பெற்று மத்தியில் பாஜக ஆட்சி அமையுமானால், தனக்கு மத்திய அமைச்சர் பதவியைப் பெறுவதற்காக டெல்லி தலைமையிடத்தில் காய் நகர்த்தும் வேலையையும் செய்து வருகிறார். இதற்காக டெல்லியில் உள்ள பாஜக மேலிடத் தலைவர்களிடம் அண்ணாமலை தொடர்ந்து பேசி வருகிறார். மத்திய அமைச்சர் பதவி தான் அவருடைய இலக்கு.